Kelot tinaniman ng 17 bala sa katawan

MANILA, Philippines - Isang backhoe operator ang pinagbabaril ng apat na lalaki matapos itong maghapunan kamakalawa ng gabi sa Valenzuela City.

 Namatay noon din ang biktima na kinilalang si Richard Padilla, 39, ng Sitio San Isidro, Brgy. San Jose, Antipolo City, Rizal.

Tumakas ang apat na kalalakihang suspek lulan ng isang puting pick-up van.

Sa ulat, bago nangyari ang pamamaril dakong alas-7:00 ng gabi  ay katatapos lang kumain ng hapunan ng biktima kasama ang mga kasamahan sa trabaho na sina Julio Casino at Nestor Abello sa isang karinderya sa may Mindanao Avenue Extension sa Sitio Sulok, Brgy. Ugong.

Nagtungo ito sa isang tindahan upang bumili ng sigarilyo nang dumating ang mga suspek at walang kaabog-abog na pinagbabaril ito.

Nang masigurong patay na ang biktima ay tumakas ang mga suspek sa direksyon ng Brgy. Kaybiga,  Caloocan City.

Nasamsam ng mga tauhan ng Scene of the Crime Operatives (SOCO) ang 17 basyong bala ng kalibre 45 baril.