Paslit pinatay, ina nagpakamatay
MANILA, Philippines - Patuloy ang imbestigasyon ng pulisya upang mabatid kung pinatay muna ng ina ang kanyang 3-anyos na anak na babae bago ito nagpakamatay nang matagpuan ang bangkay ng mga ito sa inupahan nilang pension house kamakalawa sa 11th Street, Bacolod City, Negros Occidental.
Ang mag-ina ay kinilalang sina Lea Cañete, 34; at Hannah Kate Cañete, 3; residente ng Murcia sa lalawigang ito na nadiskubreng patay dakong alas-12:30 ng tanghali sa Room 20 sa Pension Bacolod & Restaurant sa nasabing lungsod.
Ayon kay Sr. Inspector Stephen Boniba, hepe ng Station 2 ng Bacolod City Police bagaman may palatandaang nasawi sa murder-suicide ang mag-ina ay isasailalim pa ang bangkay ng mga ito sa otopsya upang mabatid kung walang naganap na foul play.
Bago ang insidente, dakong alas-6:40 noong Huwebes ng gabi ng mag-checkin si Lea kasama ang anak sa nasabing pension house at dakong alas-12:00 naman ng tanghali nitong Biyernes ay dapat na silang mag-checkout.
Pero, nang katukin ng roomboy na kinilala lamang sa pangalang Froilan ay walang sumasagot sa silid kaya’t napilitan na buksan ng master key ang silid at dito na nadiskubre ang bangkay ng mag-ina.
Si Hannah Kate ay may laslas sa magkabilang pulso at nakahiga sa kama habang ang ina naman nito ay natagpuang nakabigti ng lubid sa leeg na nakatali sa bakal ng kurtina sa shower at may tuwalyang nakatali rin sa bibig nito.
Narekober rin ang duguang blade na ginamit sa paglaslas ng pulso ng bata, lubid at tuwalya habang wala namang nakitang suicide note sa loob ng kuwartong tinuluyan ng mag-ina.
Lumilitaw pa sa imbestigasyon na nagpaalam ang ginang sa ina nitong si Luz Segovia na tutungo sa Bacolod City upang kunin ang P3,000 perang padala ng mister nito na nagtratrabaho bilang security guard sa Cavite.
- Latest
