Masibang driver, binoga
MANILA, Philippines - Dahil sa umano’y madalas na pagbubungkal ng kaldero sa kusina, binaril ng tatlong beses ang isang 30-anyos na tricycle driver habang natutulog sa bahay ng Barangay Chairman sa Tondo, Maynila kahapon ng umaga.
Kinilala ang nasawing si Gener Castro Hermosa, driver ng tricycle na pag-aari ni Chairman Arnel Dungo ng Nicolas St., Brgy. 255, Zone 23, Tondo.
Arestado naman ang suspek na si Eduardo Barco Damayo, 40, residente ng Olivarez Compound, Parañaque City at pinsan ni Chairman Dungo na nanguna sa pagtugis sa una.
Sa ulat ni SPO3 Rommel Del Rosario ng MPD-Homicide Section, alas 10:45 ng umaga nang maganap ang pamamaril sa loob ng bahay ni Chairman Dungo, sa No. 1342 Nicolas St.
Nabatid na nagbabakasyon lamang sa bahay ni Chairman Dungo ang suspek at napapansin umano nito na mistulang naaasar at nagseselos ang kaniyang pinsan sa biktima dahil madalas nitong napupuna ang asta ng biktima na diretsong pasok sa kusina sa tuwing dumarating at magbubungkal ng pagkain.
Ayon kay Dungo, wala siyang alam na dahilan upang gawin ng pinsan niya sa biktima ang pagpatay. Nang mabaril ang biktima ay nagtatakbo na ang suspek kaya hinabol ito na nasakote naman kaagad.
- Latest
