2 gunmen sa Batangas ambush, nadakip
MANILA, Philippines - Nadakip sa isang follow-up operations ang dalawang gunmen na umambus at nakapatay sa tatlong mag-anak habang malubhang nasugatan ang isa pa kamakalawa sa Tanauan City, Batangas.
Ang mga suspek ay kinilalang sina Anthony Panganiban at mastermind na si Basilio Panganiban, dating Brgy. Captain ng Brgy. Kay-Anlog, Calamba City.
Batay sa ulat, dakong ala-1:15 ng hapon ay kasalukuyang papauwi ang mga biktima sakay ng jeepney (DWL 597) galing sa pakikipagluksa sa isa ng mga itong namatay na kamag-anak sa Calamba City nang tambangan ng mga armadong suspek pagsapit sa Brgy. Laurel ng nasabing lungsod.
Ang mga nasawi ay kinilalang sina Juan Visaya, 47; Sofia Visaya at Pedro Roga. Habang isinasalba ang buhay ni Valeria Visaya.
Ayon sa ilang nakasaksi sa pangyayari, unang pinaputukan ng mga suspek ang driver at isinunod ang mga pasahero ng mga ito kung saan umakyat pa ang mga ito sa jeepney.
Bago tuluyang nagsitakas ay tinangay pa ng mga suspek ang mga personal na kagamitan ng mga biktima, pera at mga alahas.
- Latest
