Enrile, Bong atbp. may HDO na rin

MANILA, Philippines - Isang araw ang lumipas matapos magpalabas ng hold departure order (HDO) ang Sandiganba­yan  5th division laban kay Senador Jinggoy Estrada at 12 iba pang sangkot ay nagpalabas din  kahapon ang Sandiganbayan  3rd division ng HDO laban kina Senador Juan Ponce Enrile, Janet Lim Napoles, Atty. Gigi Reyes at iba pa.

Habang ang  Sandiganbayan 1st division ay naglabas din ng HDO laban kay Senador Bong Revilla at iba pang akusado sa plunder at graft case na may kinalaman sa pork barrel scam.

Ayon sa clerk of court ng 1st Division, 19 ang inilabas na HDO laban sa 47 akusado sa mga kaso.

Bukod kay Revilla kasama rin sa kautusan sina Richard Cambe, Janet Lim-Napoles, Ronald John Lim at John Raymund De Asis, na pawang nahaharap sa plunder case.

Kasama rin sa  HDO ang mga akusado sa kasong graft kabilang sina DBM Undersecretary  Mario Relampagos, Rosario Nuñez, Lalaine Paule, Marilou Bare, Antonio Ortiz, Dennis Cunanan ng TRC, Francisco Figura, Ma. Rosalinda Lacsamana, Marivic Jover at iba pang sangkot sa naturang kaso.

Ang mga nabanggit ay hindi maaaring makalabas ng bansa kung walang pahintulot ng korte.