Foreman utas: Nahulog sa gusali

MANILA, Philippines - Utas ang isang foreman ng ito ay mahulog sa ikatlong palapag na ginagawang gusali makaraang matulog sa pasamano nito sa Quezon City kamakalawa ng gabi.

Kinilala ni PO3 Ericson Isidro ang biktima na si Tomas Lagundi, 38, na nagawa pang maisugod ng kanyang mga kasamahan sa ospital pero hindi na rin umabot ng buhay.

 Nangyari ang insidente sa may loob ng isang construction site na matatagpuan sa #720 D. Tuazon St., ganap na alas-11:30 ng gabi.

Ayon kay Edgar Beltran, kasamahan ng biktima, natutulog umano siya sa ground floor ng nasabing establisyemento nang magising sa malakas na kalabog.

Agad na pinuntahan ni Beltran ang pinagmulan ng kalabog kung saan nito naabutan ang biktima na nakahandusay at duguan.

Mabilis na humingi ng tulong si Beltran sa ibang kasamahan at isinugod ang biktima sa Chinese General Hospital pero idineklara dead-on-arrival.