Mister inutas sa harap ng pamilya

MANILA, Philippines - Itinuloy pa rin ng hindi pa kilalang gunman ang pagbaril sa isang mister kahit na naninikluhod ang misis at mga anak na naganap kamakalawa ng gabi sa  Brgy.Waling-Waling, Sagun, Zamboanga del Sur.

Ang biktima na namatay noon din dahil sa tama ng bala sa iba’t ibang bahagi ng katawan ay kinilalang si Orlando Ursal, 30-anyos.

Sa ulat, dakong alas-7:00 ng gabi ay nagla­lakad ang biktima kasama ang misis at mga anak patungo sa tindahan para bumili ng softdrinks nang hara­ngin ng suspek na armado ng cal. 45 pistol.

Iniumang ng suspek ang baril sa biktima at sa kabila ng pagma­kaawa ng misis at nag-iiyakang mga paslit na anak ay pinaputukan ito ng limang beses sa ulo at katawan.

Duguang bumagsak sa lupa ang biktima at ilang saglit pa ay binawian ito ng buhay habang mabilis namang tumakas ang suspek.

Patuloy ang imbestigasyon ng pulisya kung ano ang motibo ng pagpatay at sino ang suspek.

Narekober sa crime scene ang limang basyo ng cal. 45 pistol.