December bill balewalain - Meralco

MANILA, Philippines - Balewalain na lamang ang natanggap na electric bill ngayong Disyembre na nagkaroon na ng pagtataas sa generation charge.

Ito ang naging panawagan kahapon ng Manila Electric Co. (Meralco) sa kanilang milyun-milyong kliyente at maaaring bayaran na lamang ng mga ito ang katumbas na halaga ng kanilang bill noong Nobyembre.

Ito ang naging tugon ng Meralco sa inilabas na “temporary restraining order (TRO)” ng Korte Suprema na nag-uutos na suspindehin ang P4.15 generation charge increase na inaprubahan ng Ener­gy Regulatory Commission (ERC).

Sinabi ni Al Panlilio, Meralco senior vice president and head of  Customer Retail Services and Corporate Communications, may opsyon din ang kanilang kliyente na bayaran ang December bill nila kung mas mababa ito sa kanilang bill noong Nobyembre. 

Nilinaw nito na kung ang nais bayaran ng kli­yente ay ang November bill, mababayaran lamang ito sa kanilang Meralco Business Center habang kung ang December bill ang babayaran ay maaari na itong bayaran sa lahat ng Bayad Center outlets.

Sa mga nakapagbayad naman sa kanilang December bills, balewalain lamang ang liham at ang Meralco na umano ang gagawa ng paraan para magsagawa ng adjustment sa susunod na bill.