Bus driver ng Don Mariano namatay na
MANILA, Philippines - Makaraang isang linggo na pagka-comatose ay pumanaw na kamakalawa ng gabi ang driver ng Don Mariano bus na nahulog sa Skyway noong Disyembre 16.
Sa salaysay ni Efren Risomadero, nalagutan ng hininga ang kanyang pinsan na si Carmelo Calatcat dakong alas-6:43ng gabi habang nasa “intensive care unit (ICU) ng Parañaque Doctors Hospital. Hindi pa naman nag-iisyu ng opisyal na pahayag ang pagamutan.
Sinabi pa nito na nasa pagamutan din ang live-in partner ni Calatcat na si Ledelyn Mondelangat nang bawian ito ng buhay.
Matatandaan na minamaneho ni Calatcat ang Don Mariano ordinary bus noong nakaraang linggo nang mawalan ng kontrol at malaglag mula sa itaas ng Skyway na nagresulta sa pagkasawi ng 18 katao.
Una na ring sinampahan ng kasong kriminal at administratibo ng mga kaanak ng mga nasawing pasahero si Calatcat habang isang class suit ang pinaplano laban sa pamunuan ng Don Mariano Transit na sinuspinde ang prangkisa.
- Latest
