Nagger pinatahimik ng mister

MANILA, Philippines - Marahil hindi na umano nakayanan ng isang mister ang pagiging nagger ng kanyang misis na lagi siyang tinatalakan sa paggising sa umaga kung kaya’t pinatay niya ito sa saksak naganap kahapon sa kanilang bahay sa Sitio Baybay, Barangay Andagao, Kalibo, Aklan.

Ang biktima na idineklarang dead-on-arrival sa ospital dahil sa dalawang saksak sa dibdib ay nakilalang si Amalia Pineda, 48-anyos.

Boluntaryo namang sumuko ang mister na si Aniceto Pineda, 58-anyos.

Batay sa ulat, dakong alas-7:30 ng umaga ay mahimbing na natutulog ang  suspek sa kanilang kuwarto nang pumasok ang biktima at nagtatalak ito kung kaya’t nagising ang una.

Patuloy pa rin sa pagtatalak at panenermon ng misis na ikinainis ng suspek at nagpanting sa galit kaya’t kumuha ito ng patalim at sinaksak ng dalawang beses sa dibdib ang biktima.