2 karnaper tumba sa engkuwentro vs QCPD

MANILA, Philippines - Dalawang karnaper ang tumumba habang isa ang nakatakas sa lungsod Quezon makaraang lumaban sa pulisya ilang minuto matapos na agawan ng motorsiklo ang isang lalaki kahapon ng madaling araw.

Ayon sa ulat ni Police Supt. Eleazar Matta hepe ng Quezon City Police Station 6, patuloy na inaalam  ang pagkakakilanlan ng mga nasawi dahil walang nakuhang identification card sa kanilang katawan nang maganap ang insidente.

Inagawan umano ng mga suspect ng motor ang biktimang si Robert Codilla 24, ng Steve St., Barangay Commonwealth.

Sa imbestigasyon ng pulisya, ang insidente ay naganap sa panulukan ng Peria Road, at Talisay St.,  Barangay Old Balara, ganap na alas-12 ng madaling-araw.

Ayon sa biktima, sakay siya ng isang motorsiklo at tinuturuan magmaneho ang kanyang kaibigang babae nang biglang sumulpot ang mga suspect sakay din ng motorsiklo at saka sila ginitgit. Agad naman nakatayo ang biktima at nakahingi ng saklolo  sa barangay.

Natiyempuhan naman ng mga nagpapatrolyang tauhan ng Station 6 ang mga suspect at nang sitahin ay agad na pinaputukan nito ang una. Ilang minuto rin lumaban ang mga suspects na ikinasawi ng dalawa sa mga ito habang nakatakas ang isa.