Kandidatong Kapitan natagpuang patay

MANILA, Philippines - Isang barangay kagawad na tumatakbong kapitan ang natagpuang patay sa loob ng kanyang bahay dahil sa tama ng bala sa sentido.

Nagsasagawa ng masusing imbestigasyon ang Caloocan City Police kung pinatay o nagpakamatay ang biktima na nakilalang si Victor Ando, nasa hustong gulang, ng Barangay 160, Santa Quiteria, nasabing lungsod.

Sa inisyal na ulat, dakong alas-7:00 ng umaga nang makarinig ng putok ng baril ang kaanak ng biktima sa loob ng kuwarto.

Nang puntahan ang kuwarto ay natagpuan ang biktima na duguan ang sentido kaya’t agad na dinala sa ospital, subalit idineklara itong dead on arrival.

Ang biktima na bukod sa pagiging kagawad ng tatlong termino na tumatakbong kapitan ay kasalukuyang presidente rin ng tricycle operators and drivers association sa kanilang lugar.