2 pasahero dedo sa van holdap

MANILA, Philippines - Dalawang pasahero ang nasawi nang sila ay pagbabarilin ng tatlong holdaper sa loob ng isang pampasaherong van kamakalawa ng hapon sa bayan ng Aroroy, Masbate.

Namatay noon din si Jeffrey Mangubat Ylaran, 26, security guard habang namatay sa Masbate Provincial Hospital si Dennis Jasul na kapwa nagtamo ng mga tama ng bala sa iba’t ibang bahagi ng katawan.

Batay sa ulat, dakong alas-3:00 ng hapon ay sakay ang mga biktima ng pampasaherong van at binabaybay ang kahabaan ng highway ng Sitio Ba­duyaan, Brgy. Bayombon, Masbate City.

Nang bigla na lamang nagdeklara ng holdap ang mga suspek na pasahero din at tinutukan ang driver at inutusang ihinto sa tabi ng highway.

Agad na pinaputukan ng mga suspek si Ylaran na nakaupo sa gitna sa akalang papalag ito.

Habang sa takot ay tinangka ni Jasul na buma­ba ng sasakyan para tumakas sa komosyon kaya’t pinagbabaril din. 

Tumakas ang mga suspek tangay ang P350,000 mula sa pasaherong si Cristine Capellan, 22-anyos, kahera ng Faith Micro Financing na hinihinalang siyang target ng mga hol­daper. 

Tumakas ang mga suspek lulan ng kulay dalandan na Rusi motorcycle patungo sa hindi pa malamang destinasyon.