Huling araw ng filing ng COC sa barangay elections ngayon

MANILA, Philippines - Sa mga nais na tumakbo sa barangay elections ay muling ipinaalala ni Comelec Spokesman James Jimenez na hanggang ngayong araw na lamang (Oktubre 17) ang paghahain ng kanilang certificate of candidacy (COC).

Tatanggap na lamang ang Comelec ng COCs hanggang alas-5:00 ng hapon ngayong araw, kaya’t hinimok nito ang mga kandidato na hindi pa nakapagsusumite ng kanilang kandidatura na magtungo sa mga tanggapan ng poll body.

Ayon naman kay Comelec Commissioner Grace Padaca, mula Oktubre 11, 12 at 14 ay umabot na sa 57,674 ang mga taong naghain ng kandidatura para sa pagka-barangay kapitan habang ang mga kandidato naman sa pagka-barangay kagawad ay pumalo na 467,196.