2 Tigok kay ‘Odette’

MANILA, Philippine s- Iniulat kahapon ng National Disaster Risk Reduction and Management Council (NDRRMC) na dalawa katao ang nasawi sa paglabas sa bansa ng bagyong ‘Odette’.

Kinilala ang mga nasa­wi na sina Alejandro Abalos, 50-anyos at April Kim Ma­nuel, 20 habang patuloy pa ang paghahanap sa dalawa pang nawawala na sina Ele­nita Abalos, 52, at Suzette Abalos, 28 na pawang residente ng Aurora province.

Ayon sa NDRRMC, tumaob ang sinasakyang motor bangka na M/V Mikee Rose 1 ng mga biktima na nagresulta ng pagkamatay ng dalawa at nawawala pa ang dalawa nilang kasama.

Umabot naman sa 4,191 pamilya o 19,778 katao ang naapektuhan ng bagyo sa region 1,2,3,4-B, and CAR. May  kabuuang 96 na kabahayan ang nasira sa Regions 1, 2 at CAR.

Ang mga kalsada sa Regions 2 kabilang ang Isabela; Sta. Maria-Cabagan; Tuguegarao City; Teresi­ta Avenue-Cataggaman ay hindi pa rin nadadaanan sanhi ng pag-apaw ng ilog. Habang sa Apayao Pro­vince; Claveria-Calanasan Road, Carmela section ay hindi madaanan sanhi ng pagguho ng lupa; Kalinga Province; Kalinga-Abra Road; Talalang; Balbalan at Comyas ay hindi na rin madaanan dahil sa patuloy na clearing operations, gayundin sa Benguet Province, Acop-Kabanga-Kipungan-Bacon road.

Sa Region 6, may 13 pa­­milya o 65 indibdwal ang naapektuhan ng buhawi.