Maangas inutas ng ‘pulis’

MANILA, Philippines -  Isang 40-anyos na lalaki ang pinagbabaril sa ulo ng isang lalaki na nagpakilalang pulis matapos ang kanilang  mainitang pagtatalo sa isang resto bar sa Malabon City kamakalawa.

Ang biktima na namatay noon din ay nakila­lang si Jimmy Sayson, 40, welder, may-asawa ng Lamcota St., Barangay Concepcion dahil sa mga tama ng bala sa ulo at batok buhat sa kalibre 9mm pistol. Habang tumakas naman ang hindi pa kilalang suspek.

Batay sa ulat, dakong alas-11:00 ng gabi sa tapat ng Nomo Resto Bar, sa P. Aquino St., Barangay Tonsuya ay nagkaroon ng mainitang pagtatalo ang biktima at suspek nang sabihin ng una sa biktima na “hindi  mo ako kilala, baka gusto mo paluhurin kita sa asin.”

Dito ay nagpakilala ang suspek sa biktima na siya ay isang pulis at matapos ang pagtatalo ay binayaran ng una ang kanyang bill at lumabas sa bar na lingid sa kaalaman ng biktima na inaabangan pala siya nito.

Habang pasakay ang biktima sa kanyang motorsiklo ay bigla na lamang itong nilapitan ng suspek at pinagbabaril.

Nang mapatay ang biktima ay tumakas ang suspek sakay ng motorsiklo na may plakang OW-6476,  na may nakasulat sa tagiliran na “donated by Len Len Oreta.”

Inaalam ng mga otoridad kung totoong pulis ang suspek at titingnan  din nila ang CCTV camera  sa kalapit na establisyimento na posibleng nakunan ang krimen.