Caretaker inutas habang natutulog… Tatlong patalim itinarak

MANILA, Philippines - Patraydor na pinatay ang isang 55-an­yos na caretaker ng hindi pa kilalang salarin nang ito ay tarakan ng patalim habang natutulog sa kanyang barracks sa pinapasukang kumpanya sa Sta. Mesa, Maynila kahapon ng madaling-araw.

Ang biktima ay kinilalang sa alyas na “Ver”,  may taas na 5’4” hanggang 5’5”, estibador at caretaker ng Commodity Transport Corporation, Simon Enterprises na matatagpuan sa Lubiran St. Bacood, Sta. Mesa, Maynila.

Nakita sa katawan ng biktima ang tatlong tarak ng patalim na ang pinakahuling tarak ay hindi na binunot sa  dibdib nito.

Sa pahayag ng kasamahan sa trabaho na si Dexter Madrona, nagpapahinga sila sa barracks nang marinig na humihingi ng saklolo ang biktima kaya tinungo nila ang barracks at tumambad na may
nakatarak pang kutsilyo sa dibdib nito.

Walang makapagsabi kung sino ang tumira sa biktima na umano ay mas­yadong metikuloso sa trabaho at gusto na pala­ging malinis yung paligid niya dahil sa pagiging care­taker.

Posible aniyang, sinamantala ng suspect na galit sa biktima ang pagiging lasing nito nang saksakin.