Pulis na ginulpi ng PBA import na hit and run

MANILA, Philippines -Matapos ang tatlong linggo simula nang makalabas ng ospital si PO2 Anselmo Lazatin ng Quezon City Police District na sinuntok ng dating PBA import ay muli na naman itong dinala sa ospital nang ma-hit and run kahapon ng umaga sa nasabing lungsod.

Sa ulat, ganap na alas-11:30 ng umaga ay sakay si PO2 Lazatin, 34 na nakatalaga sa QCPD-Kamuning station ng kan­yang motorsiklo papa­uwi sa Caloocan City nang mahagip ng isang kulay itim na kotse na may plakang ZNF-552 sa panulukan ng East at V. Luna Avenue, Barangay Pinyahan.

Sa lakas ng pagkaka­hagip ay tumilapon sa kanyang motorsiklo si PO2 Lazatin, pero sa halip na huminto ang kotse ay tumakas ito.

Isinugod sa East Ave­­nue Medical Center (EAMC) si PO2 Lazatin, ang da­ting ospital na pinagdalhan sa kanya nang suntukin siya ni PBA cager Jamelle Cornley noong Marso 27 na kanyang inaresto dahil sa panggugulo sa Sir William’s Hotel sa kahabaan ng Timog Ave­nue sa Ba­rangay South Triangle.

Nakalagay na sa alarma ang kotse para sa agarang pagkakadakip ng driver nito at masampahan ng kasong reckless imprudence resulting in serious physical injuries.