Taxi driver todas sa tandem

MANILA, Philippines - Todas ang isang taxi driver matapos na pagbabarilin ng dalawang suspek na riding-in-tandem sa kahabaan ng Aguinaldo Hiway, Bacoor Cavite City, kahapon ng tanghali.

Kinilala ng pulisya ang biktima na si Victor Castillo De Castro, nasa hustong gulang, residente ng Barangay Talaba 7 sa lungsod.

Hindi pa nakikilala ang dalawang suspek na riding-in-tandem na mabilis na tumakas matapos misagawa ang krimen.

Batay sa imbestigasyon ni PO2 Lindon Mindo at PO2 Ali Rimbang may hawak ng kaso, ganap na alas-12:00 ng tanghali nang maganap ang insidente habang ang biktima ay sakay ng kanyang taxi  na may plate No. TXR-115  na nakaparada sa gilid ng kalsada.

Sinasabing nilapitan ng mga suspek ang biktima at walang sabi-sabing binaril ng dalawang beses sa katawan at mabilis na tumakas sakay ng kanilang motorsiklo.

Nagsasagawa pa ng masusing imbestigasyon ang pulisya para matukoy ang motibo ng krimen at madakip ang mga salarin.