PUP Coed nagbigti

MANILA, Philippines - Winakasan ng isang 17-anyos na kolehiya ang kanyang buhay sa pamamagitan nang pagbibigti sa loob ng kanyang kuwarto sa Parañaque City, kamakalawa ng gabi.

Dinala pa sa Ospital ng Maynila, ngunit idineklara na ring patay ang biktimang si Rita Joy Bautista, 2nd year student ng Polytechnic University of the Philippines sa Sta. Mesa, Maynila, at residente ng no. 1407 Interior I Gabriel St., Brgy. Baclaran, ng lungsod.

Batay sa ulat, dakong alas-10:30 kamakalawa ng gabi ay paulit-ulit na kinakatok ng ina na si Jenny Rose ang pinto ng kuwarto ng anak, ngunit hindi ito sumasagot kaya puwersahang binuksan ang pinto at bumulaga ang nakabigting biktima.

Ayon sa mga magulang na may kinakaharap umanong problema sa kanyang pag-aaral ang kanilang anak na hindi naman nito ipinagtatapat.

Wala namang nakitang suicide note ang mga pulis sa silid ng biktima at wala ring ibang sugat bukod sa marka ng bigti sa leeg nito.