Operator nahati ang katawan sa sumabog na makina

MANILA, Philippines - Nahati ang katawan ng isang machine operator habang apat nitong kasama ang nasa kritikal na kon­disyon matapos na sumabog ang isang makina sa paggawa ng gulong kahapon ng umaga sa Valenzuela City.

Ang nasawi ay kinila­lang si Bonbong Danding, 36, residente ng nabanggit na lugar. Habang nasa kri­tikal na kondisyon sa Va­lenzuela General Hospi­tal sina Segundo Enriqui­to, 34; Nedie Espinueva, 25; Reynaldo Espinosa, 32 at isang inaalam ang pagka­kakilanlan na pawang mga  manggagawa ng Pilipinas Tire Rubber Corpora­tion, na matatagpuan sa Colon Industrial Subdivision,  Tatalon St., Barangay Ugong ng lungsod.

Sa imbestigasyon ng pulisya, dakong alas-8:30 ng umaga habang nagtatrabaho ang mga biktima ay biglang sumabog ang isang makina sa paggawa ng gulong.

Dahil malapit si Dan­ding sa  sumabog na makina ay ito ang grabeng napuruhan na kung saan ay tumama ang takip ng makina kaya’t nagkahiwalay ang ibang parte ng ka­tawan at naputulan pa ng paa.

Malaki ang hinala ng pulisya na posibleng maluwag ang pagkaka-lock ng takip ng makina kaya’t nang ma-over pressure ay sumabog ito.