Gunman ni Nicole tukoy na

MANILA, Philippines - Tukoy na umano ng Department of Justice (DOJ) ang suspek na nagpaputok ng baril noong pagsalubong sa Bagong Taon na naka­patay sa 7-anyos na si Ste­phanie Nicole Ella sa Ca­loocan City.

Ayon kay De Lima, hindi muna maaaring ibun­yag ang pangalan ng nasabing suspek dahil na­ki­kiusap aniya ang National Bureau of Investigation (NBI).

Sinabi ni De Lima,  sa loob ng linggong ito ay mahuhuli na ang naturang salarin na nagmamay-ari ng baril na nakapatay kay Stephanie Nicole.

Anang kalihim, sa ngayon ay iniimbestiga­han pa ng NBI kung ang suspek na kanilang natukoy ay tutugma rin sa re­sulta ng awtopsiya ng NBI.

Kinumpirma din ni De Lima na mayroon na ring testimonya ang testigo na positibong nagtuturo sa salarin.

Samantala, sa halip na tulungan at kaawaan ay pi­nagbabantaan pa ang pa­milya ni Nicole.

Ayon sa tiyuhin ni Nicole na si Marvin Ella, noong Linggo ng gabi ay  may dalawang hindi kila­lang lalaki ang bumaba sa motorsiklo at dumiretso sa lamay ng kanyang pamangkin.

Bago umano umalis ay sinabihan  sila ng isa sa mga lalaki na mag-ingat sila saka sumakay sa mo­torsiklo na walang mga plaka.

Dahil sa natanggap na pagbabanta ay umapela sa pulisya ang pamilya Ella na bigyan sila ng proteksyon para sa kanilang seguridad.

Muling nanawagan ang ama ni Nicole na si Jay sa kanyang mga kapitbahay na tumulong at  huwag matakot na tumestigo para malutas ang kaso ng kanyang anak.