MPF: ‘Cashpoint’ at hindi checkpoint ang ginagawa ng PNP sa motorcycle riders

MANILA, Philippines - Inihayag ni Atoy Sta. Cruz, Director for Administration ng Motorcycle Philippine Federation sa  ginanap na Balitaan sa Tinapayan na “cashpoint” at hindi checkpoint ang ginagawa ng Philippine National Police (PNP) sa mga nagmomotorsiklo.

Hindi tinututulan ng MPF ang ipinapatupad na checkpoint ng kapulisan, subalit hindi sila kumbinsido sa proseso ng pag-iinspeksiyon.

Aniya, tila hindi naman ang “violations” ang hinahanap ng mga otoridad  kung nag-iins­peksiyon sila sa mga nag­momotorsiklo kung may dalang itong “pera”.

“Di ba kung iniinspek­siyon nila ang mga nagmomotorsiklo ay inaalam kung may dala itong patalim o baril, pero hindi ganun ang nangyayari kundi tila “pera” ang hinahanap.” wika ni Sta.Cruz.

Ipinaliwanag pa ni Sta. Cruz na kung wala umanong nakitang violations ang mga otoridad ay hinahanapan ang mga ito ng  violations katulad ng diperensiya sa ilaw, makina o kahit ano pang violations na dapat ay trabaho na umano ito ng Land Transportation Office (LTO).