Bus nakanal: 28 sugatan

MANILA, Philippines - Aksidenteng nahulog sa malalim na kanal ang isang pampasaherong bus na ikinasugat ng 28 pasahero naganap sa Southern Tagalog Arterial Road (STAR) tollway sa Brgy. Lapu-Lapo II, San Jose, Batangas kamakalawa.

Ang mga biktima ay dinala sa Mary Mediatrix Medical Center sa Lipa City upang malapatan ng lunas.

Batay sa ulat ng National Disaster Risk Reduction and Management Council (NDRRMC), naganap ang sakuna sa bisinidad ng KM 90+600 sa bahagi ng STAR tollway  sa nasabing lugar dakong alas-10:30 ng umaga.

Kasalukuyang minamaneho ng driver na si Narciso Vallespin, 42, ng Muntinlupa City ang Dimple Bus (TYU 464) nang bigla na lamang mawalan ng preno ang behikulo.

Upang maiwasang makabangga ng iba pang behikulo ay kumanan ang driver hanggang sa mahulog sa isang malalim at konkretong kanal na ikinasugat ng mga pasahero nito.