Killer cop idiniin ng 9 na testigo
MANILA, Philippines - Positibong itinuro ng 9 testigo na lumantad kahapon para idiin ang sumukong si PO3 Ronald Fontejon, nakatalaga sa Police Security Protection Group (PSPG) sa Camp Crame na siyang pumaslang sa pamamagitan ng pagbigti sa kinakasama niyang si Aylie Barroca, 30, ng Tanza, Cavite sa harap ng dalawa nilang anak sa loob ng isang motel noong nakalipas na Linggo sa Sampaloc, Maynila.
Pormal nang na-inquest, kamakalawa ng gabi sa Manila Prosecutors Office sa kasong murder ang suspek at wala inirekomendang piyansa ang piskalya para sa pansamantalang kalayaan nito.
Ayon kay MPD Homicide Section chief, Sr. Insp. Joey de Ocampo, lumantad ang siyam na testigo para patunayan na ang suspek ang huling nakitang kasama ng biktima bago ito iniwang patay sa loob ng motel.
Karamihan ng tumestigo ay ang mga empleyado ng motel, land lady ng biktima na kanyang pinagpaalaman na makikipagkita sa suspek.
Sinabi pa ni De Ocampo na ang dahilan ng pagpatay ng suspek sa kanyang ka-live-in ay dahil sa ayaw na ng huli na makipagbalikan sa suspek na nawawala kapag lumalaki na ang tiyan ng biktima at kapag nakapanganak na ay muling babalikan at bubuntisin uli.
Bago nangyari ang insidente niyaya umano ng suspek ang biktima na magsimba dahil paalis na para magtrabaho sa Qatar at ipinasama pa nito ang kanilang dalawang anak, pero sa halip na sa simbahan ay sa motel itinuloy ang mag-iina at doon isinagawa ang pagpatay.
- Latest
