MANILA, Philippines - Sa ikalawang pagkakataon ay muling na-hospital arrest si dating Pangulo at ngayon ay Pampanga Rep.Gloria Macapagal-Arroyo sa Veterans Memorial Medical Center dahil sa kanyang karamdaman.
Magugunita na unang na-hospital arrest si Gng.Arroyo sa kasong electoral sabotage na nakulong ng ilang buwan bago nakalaya dahil sa piyansa at sa ikalawang pagkakataon na pagkakulong uli sa nasabing ospital sa kasong plunder na may kaugnayan sa PCSO fund scam.
Ipinagpasalamat naman ng kampo ni Gng.Arroyo ang pagpayag ng Sandiganbayan sa kahilingan ng kampo na huwag nang ilagay sa selda upang mabantayan at masubaybayan ang sakit ng dating pangulo.
Hindi na rin tumutol ang panig ng prosecution sa kahilingang ito ng kampo ni Arroyo bilang humanitarian consideration sa kasalukuyang kalusugan ng dating Pangulo.
Sinabi ni Atty. Renato Bocar, spokesman ng Sandiganbayan kabilang sa mga kondisyon na ipinataw ng First Division ay kailangang manatili lamang sa VMMC ang pasyente at mahigpit na ipinagbabawal din ang anumang uri ng panayam ng media. – Angie dela Cruz,