Delos Santos isinalba Team Philippines

MANILA, Philippines —  Isinalba ni national weightlifter Albert Ian Delos Santos ang muntikang pagkabokya ng Team Phi­lippines sa medalya nang bumuhat ng bronze medal sa 20th Asian Games kahapon sa Aichi-Nagoya, Japan.

Bukod sa tansong medalya, nagtala rin ang 20-anyos na si Delos Santos ng bagong World at Asian junior records.

Binuhat ni Delos Santos ang 141 kilogram sa snatch at 183kg sa clean and jerk para sa total lift na 324kg at tumapos sa third place sa men’s 70kg division ng weightlif­ting event sa Nagoya City Trade and Industry Center.

Ang 183kg sa clean and jerk ang bagong World at Asian junior record na inilista ng torchbearer ng Team Philippines sa Aichi-Nagoya Asiad opening ceremony.

Ang kanyang 324kg total lift ay isa ring bagong Asian junior mark.

“Marami pang i-improve. And also, may confidence moving forward,” wika ng national weightlifter na personal na pinanood ni Tokyo Olympics gold meda­list Hidilyn Diaz. “Since ‘yung numbers ko did get me a podium, so we’re on the right track despite the setbacks in training.”

Ang bronze ni Delos Santos ang ikaanim ng Pilipinas sa Aichi-Nagoya Asiad bukod sa dalawang golds ni gymnast Carlos Edriel Yulo at tig-isang silver ni mixed martial arts fighter Jean Claude Saclag at ng Gilas Pilipinas Women 3x3 team para pumuwesto sa No. 14 sa medal tally.

Humakot ang defen­ding Asiad champion China ng 105 golds, 39 silvers at 26 bronzes kasunod ang Japan (30-46-47) at Korea (14-20-36).

Sa boxing, kapwa umabante sa quarterfinals sina 2020 Tokyo Olympics silver medalists Carlo Paalam at Nesthy Petecio.

Ito ay matapos talunin ni Paalam si Jadumani Singh Mandengbam ng India, 3-0, sa men’s 55kg class at bugbugin ni Petecio si Mays Alreem Abukhadijah ng Jordan sa women’s 60kg division.

Samantala, sisi­mulan ng Alas Pilipinas Men ang kanilang kampanya sa men’s indoor volleyball competition sa pagharap sa South Korea ngayong alas-12 ng tanghali.

Sa women’s beach volleyball, swak sina Alas Pilipinas Women duo Khylem Progella at Sofiah Pagara sa Round of 16 matapos ang hree-game sweep sa Pool G  kasama ang 21-19, 21-17 panalo kina Wing Man To at Wing Tung To ng Hong Kong.

Sa skateboarding, bigo sina Mark Feliciano (9th) at Renz Gelig (10th) na makasampa sa finals ng men’s street skateboarding finals.

Sa athletics, kapwa tumapos sa No. 14 spot sina Richard Salaño (2:20:34) at Artjoy Torregosa (2:48:36) sa men’s at women’s marathon event, ayon sa pagkakasunod.

Pumuwesto si Neil Michael Catral sa ika-18 sa heats ng men’s 200m run.

Laglag sina Naomi Johnson at Zion Rose Nelson sa ika-12 at ika-14 sa heats ng women’s 200m, ayon sa pagkakasunod.

Sa equestrian, laglag ang 53-anyos na si Marie Antonette Leviste sa 34th overall matapos ang Qualifier 2.

Sa shooting, hindi nakapasok sa finals si Amparo Teresa Acuna (31st) sa women’s individual 50m rifle 3 positions event.

Sa fencing, minalas sa quarterfinals spot ang men’s team sabre mula sa 27-48 kabiguan sa India.

Sa archery, bigong makaabante sa medal round ang mga national archers sa women’s individual at team compound, men’s individual at team recurve at sa men’s individual at team compound events.

Sa women’s softball, talo ang Blu Girls sa Japan, 0-10, sa preliminary round.