Berco bigong maka-podium
MANILA, Philippines — Bigo si Eduardo Berco III na makamit ang tansong medalya matapos matalo sa repechage round ng junior male kumite -61 kilogram division ng Karate One-Youth League na inihahandog ng Philippine Sports Commission kahapon sa SM Mall of Asia Arena sa Pasay City.
Makaraan ang 1-7 kabiguan kay Maksym Viechikanov ng Ukraine sa first round ay nahulog ang Pinoy karateka sa repechage kung saan tatlong panalo ang dapat niyang maitala para makasikwat ng bronze.
Unang tinalo ng tubong General Santos City si Logan Morrison ng Scotland, 7-1, bago isinunod si Mwtt Witharana ng Sri Lanka, 3-1.
Ngunit sa ikatlong laban ay sumuko si Berco kay Hang Lao Cheok ng Macau, 1-5, sa torneong suportado ng SM Group of Companies at ng Philippine Olympic Committee.
Tumapos si Berco sa seventh place sa event na itinataguyod din ng Lanson’s Place, Citadines Bay City Manila at Milo.
Kagaya ni Berco, minalas din sa medalya si Rei Alec Servan kay Lucy Choi-Lawrence ng Australia, 1-2, sa junior female -53-kg quarterfinals.
- Latest
