Uste hinablot huling Final Four ticket

MANILA, Philippines — Kumayod nang todo sa opensa si Angeline Poyos upang akbayan ang University of Sto. Tomas sa 16-25, 25-20, 25-18, 25-16 pagsibak sa Far Eastern University sa UAAP Season 88 women’s volleyball tournament stepladder playoff kahapon sa Smart Araneta Coliseum.

Humataw si Poyos ng 26 points mula sa 22 kills at apat na blocks para sa Golden Tigresses na inupuan ang No. 4 spot sa semifinals.

Winalis ng tropa ni coach Shaq delos Santos ang  Lady Tamaraws sa tatlong beses nilang duwelo ngayong season.

May parehong 8-6 baraha ang UST at FEU pagkatapos ng 14-game elimination round kaya nagkaroon ng playoff para malaman kung sino ang uupo sa No. 4 seat sa semis.

Kakalabanin ng Golden Tigresses ang No. 3 Adamson Lady Falcons (9-5) sa stepladder semis kung saan ang mananalo ay makakatapat ang defending champion at No. 2 National University Lady Bulldogs (10-4).

Abangers naman sa championship round ang Season 87 runner-up De La Salle University na nakakuha ng outright finals berth matapos ilista ang 14-0 baraha.

“Alam naman nating ngayong season sobrang unpredictable lahat kayang manalo. Grateful lang ako sa coaches na grabe yung tiyaga sa amin, at saka sa teammates ko na iniyakan ko kagabi pa lang na please ayaw ko pang mag pro,” sabi ni UST captain Detdet Pepito na nagrehistro ng 15 excellent receptions at 18 excellent digs.

Nag-ambag sina Regina Grace Jurado, Xyza Rufel Gula at Avril Denise Bron ng tig 11, 9 at 8 ayon sa pagkakahilera para sa UST.