Bounce back win target ng Choco Mucho at Capital1
MANILA, Philippines — Ang pagbangon mula sa kabiguan ang pakay ng Choco Mucho at Capital1 Solar Energy sa kanilang duwelo sa 2026 Premier Volleyball League All-Filipino Conference sa FilOil Centre sa San Juan City.
Magtutuos ang Flying Titans at Solar Spikers ngayong alas-4 ng hapon kasunod ang salpukan ng Creamline Cool Smashers at ZUS Coffee Thunderbelles sa alas-6:30 ng gabi.
Nagmula ang Choco Mucho sa 25-27, 25-17, 21-25, 15-25 pagsuko sa Creamline, habang nakalasap ang Capital1 ng 20-25, 16-25, 25-22, 17-25 kabiguan sa PLDT sa kanilang mga huling laro.
Parehong may 1-2 baraha ang Flying Titans at Solar Spikers.
Muling aasahan ng Choco Mucho sina Sisi Rondina, Dindin Manabat Kat Tolentino, Jaila Atienza, Des Cheng at Tia Andaya.
Nagkaroon si Eya Laure ng groin at abdominal issue sa kanilang kabiguan sa Creamline at posibleng hindi makalaro.
Isasalang naman ng Capital1 sina Bella Belen, Shaya Adorador, Pauline Gaston, Jasmine Nabor, Ezra Madrigal at Cherry Nunag.
“Siyempre, despite the loss, nakita ko naman na lumaban ‘yung team,” ani Belen sa pagkatalo nila sa PLDT. “Kumbaga, mayroong glimpse na kaya, kaya sana ng team.”
Samantala, ang ikalawang sunod na panalo ang kapwa target ng Cool Smashers at Thunderbelles.
Umiskor ang Creamline sa Choco Mucho, 27-25, 17-25, 25-21, 25-15.
Wagi naman ang ZUS Coffee sa Akari, 16-25, 25-18, 18-25, 25-23, 15-12.
May 1-1 baraha ang Cool Smashers kumpara sa 1-2 marka ng Thunderbelles.
- Latest
