Cignal buwenamano sa PVL AFC

MANILA, Philippines —  Ang Cignal ang naging buwenamano sa pagsisi­mula ng 2026 Premier Volleyball League All-Filipino Conference matapos walisin ang Galeries Tower, 25-17, 25-14, 25-11, kahapon sa Filoil Centre sa San Juan City.

Pumalo si Tin Tiamzon ng 18 points mula sa 10 attacks, anim na service aces at dalawang blocks para pamunuan ang Super Spikers.

Nagdagdag si Vanie Gandler ng 14 markers habang may 13 points si Erika Santos at tumipa si setter Gel Cayuna ng 12 excellent sets.

“Parang fruition na siya ng hardwork namin and we really can’t wait to show what we’ve got as a team lalo na sa pinagdaanan namin, especially from last year,” sabi ni Tiamzon.

“As a fairly new team parang new composition, rebuilding stage iyong last year. And hopefully, this year mas ma-cement namin iyon chemistry namin,” dagdag pa ng 28-anyos na outside hitter.

Pinamunuan ni Erika Deloria ang Highrisers sa kanyang 10 points at may limang marka si veteran Aiza Pontillas.

Mula sa first set hanggang sa third frame ay hindi na pinaporma ng Cignal ni coach Shaq delos Santos ang Galeries Tower na ipinarada si bagong mentor Aying Esteban..

Sa third set ay hinataw ng Super Spikers ang 14-4 atake patungo sa 21-7 pagbaon sa Galeries Tower para kumpletuhin ang straight set win.

“I think iyong naging investment namin nu’ng offseason,” sabi ni delos Santos. “One thing din na naging advantage para sa namin is iyong (training) camp namin sa Japan.”

Sa ikalawang laro, winalis ng Choco Mucho ang Akari, 25-17, 25-23, 25-20.

Nagtuwang sina Sisi Rondina at Eya Laure para sa panalo ng Flying Titans.