Centeno, Amit pumapalag pa

MANILA, Philippines —  Pasok sina world champions Chezka Centeno at Rubilen Amit sa Last 16 stage ng WPA World Women’s 9-Ball Championship na ginaganap sa Jacksonville, Florida.

Umani si Centeno ng 0-2 pagyuko sa kamay ni veteran cue master Kelly Fisher ng Great Britain dahilan para mahulog ito sa losers’ bracket.

Ngunit mabilis na nagi­sing si Centeno nang patumbahin nito si Pearl Chiang Shui-ching ng Chinese-Taipei sa iskor na 2-1 sa do-or-die game para makahirit ng puwesto sa knockout stage.

Nauna nang tinalo ni Centeno sina American Shanelle Loraine, 2-0, sa first round at Chinese Han You sa second round, 2-1.

Hindi rin nagpakabog ang defending champion na si Amit na nagtala ngtatlong sunud-sunod na panalo para manatiling buhay ang tangka nitong back-to-back titles.

Nasa losers’ bracket si Amit kung saan iginupo nito sina Japanese Miyuki Kuribayashi (2-0), South Korean Lee Harin (2-1) at Belgian Diana Khodjaeva (2-0) para umusad sa Last 16.

Makakalaban ni Centeno sa knockout phase si Australian Hung Meng-Hsia habang titipanin naman ni Amit si Chinese Liu Shasha.

Umaasa si Centeno na makukubra nito ang kanyang ikalawang korona sa taong ito matapos pagreynahan ang WPA Women’s 10-Ball World Championships sa Bali, Indonesia noong Oktubre.

Hangad naman ni Amit na masungkit ang ikaapat na world title.