Gazz Angels sumampa sa finals

MANILA, Philippines — Dumaan sa butas ng karayom ang Petro Gazz bago matakasan ang Akari, 25-19, 25-17, 15-25, 22-25, 15-13, patungo sa final round ng 2025 Premier Volleyball League (PVL) Reinforced Conference kahapon sa Smart Araneta Coliseum.

Nagkadena si Fil-Am Brooke Van Sickle ng triple-double na 23 points, 18 excellent receptions at 13 excellent digs sa pag-abante ng Gazz Angels sa gold medal round sa Linggo.

“It’s just very surreal. We had a lot of ups and downs at the beginning of the season to be here now in the finals is amazing for the team,” sabi ng 26-anyos na si Van Sickle. “I’m just really proud of everyone stepping up, especially after that injury to Lindsey.”

Pumalo si American import Lindsey Vander Weide ng 16 markers para sa two-time Reinforced Conference champions habang may 14 at 13 points sina Myla Pablo at Fil-Am MJ Phillips, ayon sa pagkakasunod.

Tumipa si rookie setter Jules Tolentino ng 27 excellent sets at may 27 excellent digs si libero Bangs Pineda.

Pinamunuan ni American hitter Annie Mitchem ang Chargers sa kanyang game-high 28 points kasunod ang 16 markers ni Ced Domingo at 12 points ni Grethcel Soltones.

Nauna nang sinibak ng Petro Gazz ni American coach Gary Van Sickle ang dating reynang Creamline sa knockout quarterfinals, habang ginulat ng Akari ang Farm Fresh.

Lumapit sa pagwalis ang Gazz Angels nang hatawin ang 2-0 kalamangan.

Ngunit sa pagbibida nina Mitchem, Domingo, Soltones at setter Mars Alba ay nakatabla ang Chargers sa 2-2 para makahirit ng fifth set.

Nagsukatan ng lakas ang dalawang tropa hanggang maagaw ng Petro Gazz ang 11-9 abante sa pamumuno ni Vander Weide.