Diretsong tres sa Foxies

MANILA, Philippines —  Mabilis na dinispatsa ng Farm Fresh ang talsik nang Galeries Tower, 25-23, 25-13, 25-11, sa second round ng 2025 Premier Volleyball League (PVL) Reinforced Conference kahapon sa Ynares Center sa Montalban, Rizal.

Pumalo si Belgian import Eli Rousseaux ng 19 points mula sa 13 attacks, tatlong blocks at tatlong service aces.

Nagdagdag si Trisha Tubu ng 16 markers habang may 11 points si Lorene Toring at tumipa si Fil-Am setter Alohi-Robins Hardy ng 23 excellent sets.

Ang ikatlong sunod na ratsada ng Foxies ang nagtabla sa kanila sa Thunderbelles sa magkatulad nilang 6-1 record, ngunit napasakamay ang No. 1 spot dahil sa hinataw na 18 points kasunod ang 17 points ng ZUS Coffee.

Pinamunuan ni Montenegrin reinforcement Jelena Cvijovic ang Highrisers, laglag sa 0-7 marka, sa kanyang 12 points at may siyam at tig-limang marka sina Ysa Jimenez, France Ronquillo at Dim Pacres, ayon sa pagkakasunod.

Nailusot ng Farm Fresh ang 25-23 panalo sa Galeries Tower kung saan sila nakatikim ng sermon kay Italian coach  Alessandro Lodi.

“Sometimes when you start like that, you lose focus,” ani Rousseaux. “I felt it from the beginning, and we needed to get our focus back. I think that’s what coach (Lodi) meant.”

Mula rito ay hindi na nagpabaya ang Foxies at sinakmal ang second at third frames para kumpletuhin ang straight-sets win sa Highrisers.

Sa ikalawang laro, hinataw ng PLDT (6-1) ang ikaapat na sunod na panalo sa 26-28, 25-12, 25-16, 25-13 paggupo sa Chery Tiggo (2-5).