JRU binalikan ng Letran
MANILA, Philippines — Binawian ng Colegio de San Juan de Letran ang Jose Rizal University, 85-71, para sumosyo sa No. 2 spot sa Group B sa second round ng NCAA Season 101 men’s basketball tournament kahapon sa FilOil Centre sa San Juan City.
Kasabay ng pagbangon mula sa naunang kabiguan sa San Sebastian Stags ay tinapos din ng Knights, may 6-4 record katabla ang St. Benilde Blazers, ang two-game winning run ng Heavy Bombers (5-5).
Nauna nang tinalo ng Jose Rizal ang Letran sa first round.
“Sabi ko nga sa kanila the last game, hindi tayo ganito maglaro, hindi tayo ganito magdesisyon. Kitang-kita iyan sa attitude niyo at sa body language at hindi natin maitatago sa mga tao iyan,” ani coach Allen Ricardo.
Kumolekta si Jimboy Estrada ng 20 points, 3 rebounds at 3 assists para sa Knights habang nagtala si Kevin Santos ng 17 points, 7 boards, 3 steals at 2 blocks.
Pinamunuan ni Shawn Argente ang Heavy Bombers sa kanyang 16 points kasunod ang 14 markers ni Harry Herrera.
Sa ikalawang laro, itinakas ng San Sebastain Stags (3-7) ang 62-61 panalo kontra sa Perpetual Altas (8-2).
Dumiretso ang Stags sa ikalawang sunod na panalo para sa 3-7 baraha at makasilip ng tsansa sa ‘twice-to-beat’ bonus sa quarterfinals.
- Latest
