Regalario bigo kay Januarta

MANILA, Philippines — Itinodo ni Pinoy cue artist Bermie Regalario ang kanyang tikas pero hin­di sapat upang kalusin sa finals si Albert Januarta ng Indonesia sa katatapos lamang na Zen Custom Cue and Yuan 8 Open na inilaro sa Yuan 8 Club sa Shanghai, China.

Yumuko ang 2025  World 9-ball semifinalist na si Regalario kay Januarta, 8-13, sa championship round kung saan ay Race-to-13 ang labanan.

Naglaban sa finals ang 20-anyos na si Regalario at ang 17-anyos na si Ja­nuarta matapos nilang kal­dagin ang nakaharap nila sa semifinals.

Pinatalsik ni Regalario si defending champion Ko Pin Yi ng Chinese Taipei, 11-5, habang pina­taob ni Januarta si Felix Vogel ng Germany, 11-8, sa event na may $60,000 guaranteed prize.

Naibulsa ni Regalario ang second place prize na $8,000, habang $20,000 ang napunta kay Januarta at may tig-$4,000 ang dalawang semifinalists na sina Vogel at Yi.

Dumaan sa loser’s bracket si Regalario bago nakasampa sa Round-of-32 kung saan ay na­ka­sama niya ang mga ka­babayang sina Marvin Asis, Michael Feliciano at Harry Vergara.