Vergara sasargo sa Round-of-32
MANILA, Philippines — Umusad sa Round-of-32 si Pinoy cue artist Harry Vergara matapos nitong kalusin si Lo Ho Sum ng Hong Kong, 9-7, sa winner’s side ng Zen Custom Cue and Yuan 8 Open na inilalaro sa Yuan 8 Club sa Shanghai, China kahapon.
Malinis sa apat na laro si Vergara kaya naman sasandalan nito ang kanyang momentum pagharap kay Jonas Souto Comino ng Spain sa Last 32 sa torneong may nakalaan na $60,000 guaranteed prize at ikakalat hanggang 48th place.
Inaasahang mapapalaban nang todo si Vergara bago masikwat ang inaasam na korona dahil kasali pa ang defending champion na si Ko Pin Yi ng Chinese Taipei at 2024 runner-up at reigning US Open champion Aloysius Yapp ng Singapore.
Tumutumbok pa rin si dating World Champion Alex “The Lion” Pagulayan na isang Pinoy pero dala ang bandila ng Canada kaya kailangan doblehin ni Vergara ang kanyang husay at diskarte.
Samantala, nairaos nina 2025 World 9-ball semifinalist Bernie Regalario, Marvin Asis at Michael Feliciano ang laban nila sa loser’s side.
- Latest
