Roda sasargo sa Last 64
MANILA, Philippines — Nakakuha ng puwesto sa last 64 si Pinoy cue artist Jefrey Roda matapos kaldagin ang American na si Lukas Fracasso-Verner, 9-6 sa winners qualification ng US Open Pool Championship na nilaro sa Harrah’s Resort, Atlantic City, USA, kahapon.
Unang Pinoy na umusad sa knockout stage si Roda matapos magtala ng malinis na tatlong panalo sa event na nakalaan ang $500,000 guaranteed prize na ipamumudmod hanggang 64th place.
Sa ngayon nag-aabang si Roda ng makakalaban sa round-of-64 kung saan ay Race-to-10 ang labanan, malaki ang tsansa nitong mahablot ang inaasam na $100,000 premyo sa magka-kampeon.
Unang kinalos ni Roda si Nguyen Hoang Tuan, 9-3 ng Vietnam sa round 1 at saka tinalo si Paul Song, 9-1 ng host country sa round 2.
Walang talo sa dalawang laro sina reigning World 9-Ball championCarlo Biado at Johann Chua, nakatakda silang sumargo sa magkahiwalay na laban at sakaling manalo ay sasamahan nila si Roda sa last 64.
Ibubulsa ng runner-up ang $50,000, mapupunta sa dalawang semifinalists ang tig-$25,000, tig-$15,000 naman ang apat na quarterfinalists habang tig-$8,000 ang ninth to 16th places.
Sisikwatin naman ng 17th hanggang 32 ang tig- $5,000 habang tig-$3,000 ang 33rd hanggang 64th.
Ang ibang Pinoy na tutumbok sa winners side ay sina Bernie Regalario, Roland Garcia, Marvin Asis at 2007 WPA World 9-Ball runner-up Roberto Gomez.
- Latest
