Cruz nadale ng hamstring injury
MANILA, Philippines — Nadale ng hamstring injury si Jericho Cruz at posibleng hindi makalaro sa kampanya ng Guam sa 2025 FIBA Asia Cup.
Hindi sumalang ang Fil-Guamanian standout sa 63-102 kabiguan ng Guam kontra sa Japan kamakalawa dahil sa naturang injury na iindahin ng koponan sa knockout match laban sa Korea para sa puwesto sa quarterfinals.
Natamo ito ni Cruz sa 82-73 panalo nila kontra sa Syria para masiguro ang tersera puwesta sa Group B at makapasok pa sa qualification patungo sa quarterfinals kahit pa natalo rin laban sa No. 1 seed na Iran, 52-77.
Nagbuhos si Cruz ng game-high na 21 points tampok ang limang tres para banderahaan ang mga bataan ni coach EJ Calvo.
“Jericho pulled his hamstring late in the game (against Syria) and we’re hoping today (Sunday) it will miraculously feel better,” ani Calvo.
“But the hamstring is a tough injury. And it’s unlikely he’ll be able to go with the treatment alone in the next two days,” dagdag nito
Si Cruz ang ikalawang best player ng Guam sa likod ni Tai Wesley (17.7 points) sa kampanya nito sa group phase tampok ang rehistrong 16.0 points.
Kagagaling lang ni Cruz sa pambihirang Finals MVP performance para sa San Miguel Beer sa 2025 PBA Philippine Cup bago samahan ang Guam sa kauna-unahan nitong FIBA Asia Cup appearance.
Sa Guam lumaki si Cruz bago mag-aral sa Adamson sa UAAP at makapasok sa PBA bilang No. 9 pick ng Rain or Shine noong 2014 draft.
Naglaro rin siya sa TNT at NLEX bago maglagi sa SMB.
- Latest
