Thunder vs Rockets sa 2025 NBA season opener
NEW YORK - Sisimulan ng Oklahoma City Thunder ang pagdedepensa sa kanilang korona sa pagsagupa sa Houston Rockets sa pagbubukas ng 2025-26 NBA season sa Oktubre 22 (Manila time).
Muling babanderahan nina MVP Shai Gilgeous-Alexander, Jalen Williams at Chet Holmgren ang Thunder para sa misyon nilang back-to-back championship matapos talunin ang Indiana Pacers, 4-3, sa kanilang best-of-seven title series.
Nagpalakas ang Rockets sa paghugot kay Kevin Durant mula sa Phoenix sa seven-team blockbuster deal na nagdala rin kina Fil-Am Jalen Green at Dillon Brooks sa Suns.
Makakasama ng two-time champion na si Durant sa Houston sina Fred VanVleet, Amen Thompson, Alperen Sengun at Steven Adams.
Magtutuos din sa Oktubre 22 ang Golden State Warriors nina Stephen Curry at Jimmy Butler at ang Los Angeles Lakers nina LeBron James at Luka Doncic.
Sibak ang Warriors sa semifinals, habang napatalsik ang Lakers sa first round ng nakaraang season.
- Latest
