Prieto pinatalsik ni Chua, pasok sa semis

MANILA, Philippines — Patuloy ang mainit na tumbok ni Johann Chua kaya naman sumampa ito sa semifinals ng Knight Shot Open na nilalaro sa Impulse Snooker & Billiards Cafe, Oud Metha, Dubai, United Arab Emirates (UAE).

Pinatalsik ni Pinoy cue artist Chua ang kababayan nitong si Jeffrey Prieto, 11-6 sa Race-to-11 quarterfinals match kahapon kaya luma-lakas ang tsansa nitong mag kampeon sa $52,000 prize fund tournament.

Makakalaban ni Chua sa last 4 si three-time world championship semi-finalist David Alcaide ng Spain na kinalos si Mortiz Neuhausen, 11-8 ng Germany.

Pinagpag muna ni 2023 World Cup of Pool champion, Chua si Jonas Sauto, 10-7 ng Spain sa kanilang Race to 10 match sa winner’s qualification bago sumampa ito sa quarters.

May tsansa sana na dalawang Pinoy ang makakapasok sa semis kaso natapat naman si Prieto kay Chua nang magkaroon ng draw mula sa nanalo sa loser’s bracket.

Dumaan sa butas ng karayom si Prieto bago naka-abot sa last 8 dahil kinailangan nitong manalo ng limang beses sa loser’s bracket.

Kakalawitin ng magka-kampeon ang $15,000 premyo.