Suarez-Navarrete rematch ipinag-utos

MANILA, Philippines — Tiyak na ang muling paghaharap nina Pinoy challenger Charly Suarez at Mexican world super featherweight champion Emanuel “Vaquero” Navarrete.

Kahapon ay nagdesisyon ang California State Athletic Commission (CSAC) na ibasura ang naunang technical decision win ni Navarrete sa kanilang title fight ni Suarez noong Mayo 11 sa Pechanga Arena sa San Diego, California.

Itinigil ni referee Edward Collantes ang nasabing laban sa eighth round dahil sa putok sa kaliwang kilay ni Navarrete na dahil daw sa headbutt kay Suarez.

Ngunit sa replay ay napatunayang kumonekta si Suarez ng isang solidong right straight sa kaliwang kilay ni Navarrete, ang World Boxing Organization (WBO) super fea­therweight title-holder, sa sixth round.

Matapos ang ilang linggong pag-aaral ay ipinag-utos ng CSAC ang rematch nina Suarez (18-0-0, 10 knockouts) at Navarrete (39-2-1, 32 KOs).

“The only fair thing to do,” pahayag ng komisyon sa rematch na itatakda ng Top Rank Promotions ni Bob Arum.

Kasalukuyang nasa isang medical suspension si Navarette hanggang Hulyo 9 dahil sa kanyang sugat sa kaliwang kilay.

Pumabor ang tatlong judges sa 30-anyos na si Navarrete sa scorecards, 78-75, 77-76, 77-76, nang ihinto ang kanilang laban ng 36-anyos na si Suarez.

Hangad ni Suarez na maging ikatlong Pinoy world boxing champion matapos sina Melvin Jerusalem (WBC minimumweight) at Pedro Taduran (IBF minimumweight).