DeRozan, LaVine hataw sa Kings
HOUSTON — Humataw si DeMar DeRozan ng 21 points para gabayan ang Sacramento Kings sa 113-103 pagpapabagsak sa Rockets para sa kanilang ikatlong dikit na panalo.
Nagdagdag si Zach LaVine ng 20 points para sa Sacramento (31-28) na nanalo pa rin kahit nagkaroon si Domantas Sabonis ng left hamstring injury at hindi nakabalik sa laro.
Pinamunuan ni Alperen Sengun ang Houston (37-23) sa kanyang 30 points at 10 rebounds habang may 24 markers si Fil-Am guard Jalen Green.
Isang 13-3 atake ang ginawa ng Kings para iposte ang 97-85 abante sa pagsisimula ng fourth period tampok ang tig-isang three-point shots nina LaVine at Keon Ellis.
Mula rito ay hindi na nakalapit ang Rockets.
Sa Memphis, ipinasok ni De’Aaron Fox ang isang 20-footer sa huling 2.6 segundo sa 130-128 paglusot ng San Antonio Spurs (25-33) sa Grizzlies (38-22).
Sa Dallas, humakot si Giannis Antetokounmpo ng 29 points, 9 rebounds at 9 assists habang may 28 markers si Damian Lillard sa 132-117 pagsuwag ng Milwaukee Bucks (34-25) sa Mavericks (32-29).
- Latest
