Bounce-back win ng Creamline
MANILA, Philippines — Bumanat si Tots Carlos ng 18 points mula sa 16 attacks, isang service ace at isang block para gabayan ang nagdedepensang Creamline sa 25-15, 26-24, 25-19 paggiba sa Galeries Tower sa 2024-25 Premier Volleyball League (PVL) All-Filipino Conference kahapon sa PhilSports Arena sa Pasig City.
Nag-ambag si Alyssa Valdez ng 16 points galing sa 15 attacks at isang block sa bounce-back win ng Cool Smashers mula sa kauna-unahang kabiguan sa PLDT High Speed Hitters para ilista ang 10-1 kartada.
Pormal na inupuan ng tropa ni coach Sherwin Meneses ang No. 1 spot sa knockout round kaharap ang No. 12 team na maaaring isa sa Highrisers (1-10), Capital1 Solar Energy Spikers (1-10) at Nxled Chameleons (1-9).
“Siyempre, masaya ulit, ranked one kami. I think may konting advantage kasi lower ranked iyong makakalaban mo,” wika ni Meneses.
Nagdagdag sina Bea De Leon, Jema Galanza at Pangs Panaga ng pinagsamang 16 points para sa PVL Grand Slam champions na naunang nagwakas ang 19-game winning streak simula noong 2024 Reinforced Conference nang matalo sa PLDT noong nakaraang Sabado.
Kinuha ng Creamline ang first set, 25-15, bago iposte ng Galeries Tower ang 19-11 kalamangan sa second frame sa pagbandera ni Ysa Jimenez.
Nagtuwang sina Valdez at Carlos sa paghuhulog ng isang 15-5 bomba para ibigay sa Cool Smashers ang 26-24 panalo at ibaon ang Highrisers sa 2-0.
Pinalo ng Creamline ang 7-3 abante sa third set patungo sa 25-19 pagwalis sa Galeries Tower tampok ang panapos na hataw ni Pau Soriano.
- Latest
