Mapua ‘di bibitaw sa 2nd spot
MANILA, Philippines — Ang patuloy na pagsosolo sa second spot ang hangad ng Mapua University sa pagharap sa Letran College sa second round ng NCAA Season 100 men’s basketball tournament.
Magtutuos ang Cardinals at Knights ngayong alas-2:30 ng hapon matapos ang upakan ng nagdedepensang San Beda Red Lions at Perpetual Help Altas sa alas-12 ng tanghali sa FilOil EcoOil Centre sa San Juan City.
Nasa itaas ng team standings ang St. Benilde bitbit ang 9-2 record kasunod ang Mapua (8-3), San Beda (7-4), Lyceum (6-5), Letran (6-5), Perpetual (5-6), Emilio Aguinaldo College (5-6), Jose Rizal (3-8), Arellano (3-8) at San Sebastian (3-8).
Nasa two-game winning run ang Mapua matapos talunin ang JRU, 75-71, at EAC, 82-79.
Kabaligtaran ito ng estado ng Knights na nahulog sa dalawang dikit na kamalasan mula sa 68-91 kabiguan sa Pirates at 61-71 pagsuko sa Altas.
Muling aasahan ng Mapua sina reigning MVP Clint Escamis, Cyrus Cuenco at Chris Hubilla, habang hindi maglalaro si star guard Jimboy Estrada para sa Letran.
Ibinasura ng NCAA Management Committee (ManCom) ang apela ng Knights na bawiin ang suspensyon kay Estrada na tinawagan ng dalawang unsportsmanlike foul sa laro nila ng Perpetual.
Hindi natapos ni Estrada ang laro, ngunit naglista ito ng 14 points, 10 assists at 7 rebounds para sa Letran.
- Latest
