Akari nakatutok sa finals vs PLDT

Creamline, Cignal bakbakan din

MANILA, Philippines — Ang ika-10 sunod na ratsada ang magpapasok sa Akari sa kanilang kauna-unahang championship appearance sa Premier Volleyball League (PVL).

At ang PLDT Home Fibr ang hahadlang sa kanilang misyon.

Lalabanan ng Chargers ang High Speed Hitters ngayong alas-4 ng hapon kasunod ang salpukan ng Creamline Cool Sma­shers at Cignal HD Spi­kers sa knockout semifinal matches ng 2024 PVL Reinforced Conference sa Philsports Arena sa Pasig City.

Tinapos ng Akari ang elimination round sa 8-0 para maging No. 1 team bago sinibak ang No. 8 Farm Fresh, 17-25, 25-18, 25-22, 25-23, sa knockout quarterfinals para sa pang-siyam na sunod na panalo.

“Our record doesn’t mean anything because if we lose this game, that’s it. We just want to focus on what we need to do,” sabi ni American import Oly Okaro.

Pinatalsik ng PLDT ang Chery Tiggo, 25-23, 25-27, 15-25, 25-18, 15-9, sa kanilang knockout quarterfinals match papasok sa semis.

“We’re happy to reach the semis, but we only had one day to prepare. We have to be mentally ready,” ani coach Rald Ricafort. “It’s all about focus, patience, extra effort and the desire to win.”

Pag-aagawan din ng Creamline at Cignal ang finals berth sa ikalawang laro.

Sinibak ng Cool Smashers ang Petro Gazz Angels, 25-23, 25-19, 25-18, at pinagbakasyon ng HD Spikers ang Capital1 Solar Spikers,  25-19, 36-34, 16-25, 22-25, 15-12, sa quarterfinals.

Umabante ang Creamline sa semis katapat ang Cignal bagama’t hindi nag­lalaro sina injured Alyssa Valdez at Tots Carlos habang kasama si Jema Galanza sa training ng Alas Pilipinas.

“Hindi pa tapos, magtatrabaho kami uli. S­obrang saya lang kasi na-survive namin itong game na ito,” wika ni Bernadeth Pons na tumipa ng 16 points at 12 excellent receptions sa panalo ng Cool Smashers sa Gazz Angels.