Yulo kakasa sa 3 finals event

PARIS -- Malaki ang tsansa ni Carlos Yulo na makasikwat ng gold medal matapos pumasok sa finals ng all-events, floor exercise at vault ng men’s artistic gymnastics sa 2024 Olympic Games dito sa Bercy Arena.

Sa Subdivision 3 sa qualifying phase ay pumo­sisyon si Yulo sa No. 2 sa floor exercise, No. 6 sa vault at No. 9 sa floor exercise.

Kumpiyansa si Gymnastics Association of the Philippines (GAP) president Cynthia Carrion sa kakayahan ng 24-anyos na Pinoy gymnast na makakuha ng Olympic gold.

“Very relaxed si Carlos, but we will be in full energy and full force (in the finals),” wika ni Carrion kay Yulo na nanalo ng dalawang gold medal sa FIG World Championships.

Pupuntirya si Yulo ng Olympic gold sa pagsalang niya sa all-around final sa Miyerkules, sa floor exercise final sa Sabado at sa vault final sa Linggo.

Naniniwala ang tubong Leveriza, Manila na maduduplika niya ang pagbuhat ni weightlifter Hidilyn Diaz sa kauna-unahang Olympic gold medal ng Pinas sa Tokyo Games.

“In overall all (all events) mahirap, even bronze mahirap. Pero sa floor magaling siya. He can win at least one  gold, or maybe two if he does well in the vault,” sabi ni Carrion kay Yulo.

“He’s relaxing now. He’s happy. He’s off Sunday then full force, training and training, from Monday onwards,” dagdag nito.

Naghari si Yulo sa men’s floor exercise sa 2019 World Championships sa Stuttgart, Germany at sa vault sa 2021 edition sa Kitakyushu, Japan.

Ang top eight sa bawat apparatus ang aabante sa finals, habang ang top 24 sa all events ay lalaban sa medal play.