Akari sumosyo sa liderato sa Pool B

MANILA, Philippines — Dumiretso ang Akari sa paghataw ng ikatlong sunod na panalo mula sa 23-25, 21-25, 25-23, 29-27, 16-14 paggupo sa nagdedepensang Petro Gazz sa Pool B ng 2024 PVL Reinforced Confe­rence kahapon sa Philsports Arena sa Pasig City.

Nagpasabog si American import Oly Okaro ng 31 points mula sa 29 attacks para sa pagsosyo ng Chargers sa liderato katabla ang Cignal HD Spikers.

Humataw si Grethcel Soltones ng 19 markers buhat sa 16 hits at tatlong service aces na ang huli ay sumelyo sa kanilang panalo, habang ay 18 at 11 points sina Ivy Lacsina at Ced Domingo, ayon sa pagkakasunod.

Umiskor si Fil-American Brooke Van Sickle ng 24 points kasunod ang 22 markers ni Cuban import Wilma Salas sa panig ng Gazz Angels na lugmok sa 1-2 baraha.

Bumangon ang Akari mula sa 0-2 butas para makatabla sa 2-2 bago nagtuwang sina Okaro at Soltones sa dulo ng fifth set para pabagsakin ang Petro Gazz.

Sa unang laro, bumira si Venezuelan import MJ Perez ng  23 points mula sa 20 attacks, dalawang service aces at isang block para sa 25-20, 25-17, 23-25, 25-13 pagdaig ng Cignal HD sa Capital1 Solar Energy.

Ito ang ikatlong sunod na ratsada ng HD Spikers na nakahugot kina Ces Molina at Jacqueline Acuna ng tig-12 markers.

“Of course, we are happy but still it’s not enough I feel,” wika ni Perez. “I still feel that we haven’t reached our peak and we need to push more,especially like this kind of game.”

Matapos kunin ng Cignal ang 2-0 bentahe ay nakabangon ang Capital1 sa third set sa likod ni Russian import Marina Tushova, humataw ng 28 points, para makadikit sa 1-2.

Sa pamumuno ng 32-anyos na si Perez ay ipinoste ng HD Spikers ang 18-9 abante patungo sa panalo sa Solar Spikers.