T-Wolves nakaisa sa Nuggets sa West semis
DENVER — Pumukol si Anthony Edwards ng playoff career-high at franchise postseason-record 43 points para banderahan ang Minnesota Timberwolves sa 106-99 pagdaig sa defending NBA champion Nuggets sa Game One ng Western Conference semifinals series.
Umiskor si Naz Reid ng 14 sa kanyang 16 points sa fourth quarter para sa 1-0 lead ng Minnesota habang may 20 markers si Karl-Anthony Towns bagama’t nalagay sa foul trouble.
“The whole team, we trust each other,” ani Edwards. “It doesn’t matter down the stretch who takes the shot.”
Ang Denver pa rin ang hahawak sa Game Two bukas.
Humakot si two-time NBA MVP Nikola Jokic ng 32 points, 8 rebounds at 9 assists para sa Nuggets at may 17 markers si Jamal Murray na hindi nakaiskor sa first half.
“We need to do a better job of making them make tough shots, maybe make the extra pass,” ani Jokic.
Nagtabla sa 84-84, kumamada ang Timberwolves ng 18-7 atake kasama ang 10 points ni Reid para tuluyan nang angkinin ang panalo.
Samantala, pag-aagawan ng Orlando Magic at Cleveland Cavaliers ang semis berth sa Game 7 ng kanilang first-round playoff duel ngayon.
- Latest
