Lady Bulldogs nanakmal
MANILA, Philippines — Nilapa ng National University ang University of the Philippines, 25-17, 25-16, 25-17, sa UAAP Season 86 women’s volleyball tournament kahapon sa Mall of Asia Arena sa Pasay City.
Maagang ipinakita ng 2023 runner-up Lady Bulldogs ang kanilang bangis matapos sakmalin kaagad sa unang dalawang sets ang Lady Maroons.
Tumikada si Evangeline Alinsug ng 15 points mula sa 13 attacks, 1 block at 1 ace upang tulungan ang NU na sikwatin ang three-game winning streak para sa 3-1 karta.
Kumana rin sina Mhicaela Belen at Alyssa Solomon ng tig-10 markers para solohin liderato.
“We’re really happy na paunti-unti na po kaming nakakabangon sa pagkatalo namin. Naniniwala po ako na hindi pa ito ang kakayanan ng team, mayroon pa kami kayang ilabas,” ani Belen.
Sunod na makakalaban ng NU ang Far Eastern University sa Miyerkules, habang pakay ng UP na sikwatin ang unang panalo pagharap nila sa La Salle sa Marso 10.
Sa ikalawang laro, winalis ng nagdedepensang La Salle Lady Spikers ang Ateneo Lady Eagles, 25-12, 25-22, 25-19.
Samantala, nakatakdang magsagupa ang UE Lady Warriors at Adamson Lady Falcons ngayong alas-2 ng hapon kasunod ang upakan ng UST Golden Tigresses at FEU Lady Tamaraws sa alas-4 ng hapon.
- Latest